Dewch i Siarad Porth y De

Yn dilyn cymeradwyo Cynllun Creu Lleoedd Pontypridd ym mis Mehefin 2022, mae'r Cyngor wedi bod yn gweithio gyda charfan amlddisgyblaethol arbenigol i lunio cynigion adfywio y mae modd eu cyflawni ar gyfer 'Porth y De': ardal weithredu allweddol sydd wedi'i lleoli i'r de o Ganol y Dref, fel sydd wedi’i diffinio yn y Cynllun Creu Lleoedd.

Ymhlith yr amcanion allweddol ar gyfer darparu buddsoddiad yn yr ardal yma mae: gwella'r profiad o gyrraedd y dref; creu parth cyhoeddus amlbwrpas o ansawdd uchel; gwella'r cysylltiad rhwng dulliau trafnidiaeth gwahanol y tu allan i'r orsaf drenau; ac ailddatblygu'r blociau trefol allweddol i agor y dref hyd at yr Afon Rhondda, Afon Taf a Pharc Coffa Ynysangharad.

Bydd cyflawni'r prosiectau allweddol canlynol yn cefnogi'r broses o wireddu'r amcanion uchod:

• Ailddatblygu 97-102 Stryd Taf (hen siopau M&S/Dorothy Perkins/Burton) i sefydlu plaza newydd ar lan yr afon.
• Ailddatblygu safle'r hen neuadd bingo i ddarparu tir y cyhoedd a 'choridor bysiau'.
• Ailwampio cwrt blaen yr orsaf i wella symudiad a chroesfannau i gerddwyr.
• Ail-bwrpasu Tŷ Sardis.
• Rhesymoli a gwella eiddo presennol.

Mae'r dudalen yma'n cynnwys diweddariadau pwysig am gynnydd prosiectau allweddol, yn ogystal â gwybodaeth am weithgareddau ymgysylltu yn y dyfodol. Mae modd i chi ddysgu rhagor am gerrig milltir y prosiectau drwy gadw llygad ar ein cyfrifon cyfryngau cymdeithasol a datganiadau i'r wasg. Fodd bynnag, os oes gyda chi unrhyw gwestiynau am brosiectau Porth y De, mae croeso i chi e-bostio: PorthyDe@rctcbc.gov.uk.

Mae cylchlythyr Walters', y contractwr dymchwel arbenigol, sy'n trafod y gwaith dymchwel parhaus yn 97-102 Stryd y Taf, i’w weld isod.